Абай облысындағы асфальт зауытында өрт шығып, 10 тонна битум жанып кетті деп хабарлады turkystan.kz. Абай облысы Төтенше жағдайлар департаменті баспасөз қызметінің мәліметі бойынша, 3 шілде күні «101» пультіне Ақсуат ауданы Шыбынды ауылында орналасқан асфальт зауытында өрт шыққаны жайлы хабар түскен. Оқиға орнына өрт сөндірушілер шұғыл жетті.

«Құтқарушылар сол жерге келгенде зауыт аумағында битумды 3 бөшке өртеніп жатты. Отпен күрескен өрт сөндірушілер жарты сағат ішінде өртті ауыздықтады. Абырой болғанда, зардап шеккен ешкім жоқ», – деп жазылған хабарламада.

Өрттің нақты неден шыққаны әзірге белгісіз. Тексеру жұмыстары басталды.