Байзақтағы 23 балабақша қысқы маусымға сақадай сай

Бұл туралы аудан әкімі Бақыт Қазанбасов айтып берді. Оның сөзіне қарағанда, ауданда бюджеттік 23 балабақша орналасса, 16-сы – газбен, 7-еуі көмірмен жылытылады. Қажетті отын қорын алуға оларға жергілікті бюджеттен 18,75 млн теңге қарастырылған. Көгілдір отынға – 13,5 млн теңге. Қазіргі таңда мердігер мекеме – «Иманалиев Медеу Суйендикович» жеке кәсіпкерлігі барлық көмірді тасымалдап үлгерген. «Мәдениет саласы бойынша 19 нысан бар десек, олардың 14-і – газбен, 5-еуі қатты отынмен жылу таратады. Қысқы жылыту маусымына қажетті отын қорын алуға жалпы 5,8 млн теңге бөлінді. 50 тонна көмір түсіруге – 1,9 млн теңге, көгілдір отынға 3,9 млн теңге есептелді. 1 тонна көмірдің бағасы – 18 200 теңгеден. Қазіргі таңда 50 тонна немесе 100 пайыз көмір толығымен түсірілді», - деді аудан әкімі. Ол жергілікті спорт бөліміне қарасты 2 нысанды көгілдір отынмен қамтуға 2,3 млн теңге қаралғанын мәлімдеді. Ал Жамбыл облысы әкімдігінің білім басқармасының Байзақ ауданындағы білім бөліміне қарасты 44 мектеп жұмыс істейді. Олардың 30-ы газбен, 14-і көмірмен жылытылады екен. Мектептен тыс 7 нысанның – Балалар мен жасөспірімдер орталығы, Өнер мектебі, К.Әзірбаев атындағы балалар саз мектебі, Көркем сурет балалар мектебі, Балалар-жастар шығармашылық орталығы, Балалар шығармашылық және тәрбие орталығы, Психологиялық педагогикалық түзету кабинетінің барлығына табиғи газ желісі тартылған.