Жібек жолындағы мектептің құрылыс жұмыстары қызу жүруде

Құрылыс компаниясының директоры Елмұрат Күнібеков құрылыс жұмыстары барлық бағытта, бір мезгілде жүргізіліп жатқандығын хабарлады. Оның айтуынша, бір бригада алғашқы қабаттың кірпішін қалап жатса, енді бір топ монтаждау, келесі бірнеше жұмысшы дәнекерлеу ісімен айналысуда. Құрылыс басында 100-ге жуық құрылысшы жұмыс істеу үстінде. Олардың басым бөлігі жергілікті тұрғындар. «Қазіргі таңда құрылыс жұмыстарының 50 пайыздан астамын аяқтап үлгердік. Нысанды қаңтар айының соңында тапсырмақ ниеттеміз. Барлық шаруаны сапалы атқаруға тырысамыз. Өйткені, мұнда оқушылар білім алады», - деп атап өтті Е.Күнібеков. Облыс әкімі Бердібек Сапарбаев мектеп құрылысын уақытылы әрі сапалы аяқтауды тапсырып, аудан басшылығы мен мердігерлерге нақты міндеттер жүктеді. Жалпы, Байзақ ауданындағы әскери бөлімде орын алған төтенше жағдайдан 176 нысан зардап шексе, 168 нысан толығымен қалпына келтірілді. 12 кәсіпкерлік нысанның бүгінде бесеуі жөнделіп, қайта жұмысын бастаған. 7 нысанда құрылыс жұмыстары қызу жалғасуда.