Қазақстан Үкіметі Жаңатас қаласын әлеуметтік-экономикалық дамытудың 2023 жылдан 2027 жылға дейінгі кезеңге арналған кешенді жоспарын бекітті. Бұл туралы ҚР Ұлттық экономика министрлігінің сайтында  жарияланды.  Жаңатас «Қазфосфат» ЖШС («Қаратау» КБК) және «Еврохим» ЖШС қала құраушы кәсіпорындары бар шағын шалғайдағы моноқалалардың бірі болып табылады. Қала қызметінің негізгі бағыты фосфорит өндіру болып табылады. Кешенді жоспар өңірдің тұрақты дамуын қамтамасыз ету мақсатында әзірленді және жалпы құны 652,3 млрд. теңге болатын (РБ – 3,9 млрд. теңге, ЖБ – 7,1 млрд. теңге және басқа да көздер – 641,3 млрд. теңге) 75 іс-шараны қамтиды. Жоспарланған іс-шаралар бес негізгі блокқа бөлінген:

• Қалалық ортаны жоспарлау;
• Экономиканың нақты секторы;
• Халықты жұмыспен қамтуды қамтамасыз ету;
• Әлеуметтік және инженерлік инфрақұрылым;
• Экология.

Қалалық ортаны жоспарлау жөніндегі блок шеңберінде Жаңатас қаласы үшін дизайн-код жасау көзделген. 640,1 миллиард теңге көлеміндегі негізгі қаржылық қолдау өнеркәсіпті, ауыл шаруашылығын және кәсіпкерлік қызметті дамытуды қоса алғанда, экономиканың нақты секторын нығайтуға бағытталады. Бұл инвестициялар 500 жұмыс орнын құрумен «Еврохим-Қаратау» ЖШС химиялық кешені құрылысының екінші кезеңі, «Сарысу» жел электр станциясының құрылысы (20 жұмыс орнын құру), «QazaqSoda» ЖШС кальцийленген сода зауытының құрылысы, сондай-ақ құс фабрикасы мен көкөніс қоймасын ашу сияқты түрлі жобаларды іске асыру үшін пайдаланылады. Бөлінген қаражат көлемі бойынша екінші блок әлеуметтік және инженерлік инфрақұрылымды дамытумен байланысты. Осы блок шеңберінде төрт мектепті күрделі жөндеу, спорт және жаттығу алаңдарын ашу, аулалар мен қоғамдық аумақтарды абаттандыру, сондай-ақ инженерлік желілер мен коммуникацияларды реконструкциялау жоспарлануда. Жаңатаста экологиялық жағдайды жақсарту үшін қоқыс сұрыптау кешенін орнату жоспарланған, бұдан басқа, ағаштар мен бұталарды отырғызу бойынша жұмыстар жүргізіледі. Жұмыспен қамту деңгейін арттыру мақсатында жұмыс берушілердің өтінімдері бойынша оқу ұйымдарында жұмыссыздарды оқыту және білім беру мекемелерінің түлектері үшін жастар практикасын ұйымдастыру көзделген.