Талас ауданындағы Тамды ауылының тумасы Жақсылық Мамырбекұлын бүгінде танымайтын адам кемде-кем. Желаяқ қария 68 жасында жүгіруден түрлі жарыстарға қатысып, талайды таңғалдыруда. Ал биыл Қырғыз елінің Ыстықкөл аймағында өткен Халықаралық жарыста жерлесіміз топ жарып, қырғыздарды қайран қалдырды. Негізі Жақсылық қарияның жастайынан спортқа жаны құмар болған. Жоғары оқу орнын дене шынықтыру пәнінің мамандығы бойынша тәмамдап, Қаратау қаласында талай шәкірт тәрбиелеген. Кейіннен өмір ағысы оны теміржол саласына бұрып, осында 17 жыл еңбек етеді. Ал жүгіру спортына зейнетке шыққаннан кейін 63 жасында келген. Ең алғашқы жарысы 2017 жылы Алматы төрінде өткен екен. 12 мың адам қатысқан марафонда 21 шақырымды жүгіріп өтіп, өз әлеуетін сынап көреді. Осы жылы «ЭКСПО-2017» көрмесінің марафонына 4 немересімен бірге қатысып, тәжірибесін шыңдай түседі. 2018 жылы Атырау облысындағы аламанға қосылса, 2019 жылы Ресей мемлекетінің Санк-Петербург қаласындағы марафонда да төбе көрсеткен. Осылайша жеңіл атлетика спортына бейімделе түскен қария биылғы жылдың мамыр айында Қырғыз мемлекеті Ыстықкөл қаласында түндігі түрілген додада дара шауып, талайдың таңдайын қақтырады. – Санк-Петербургтегі де, Қырғыз еліндегі жарысқа да өзім қаражат тауып бардым. Еңбек Ері Мұқаш Ескендіров сынды азаматтың көп көмегі тиді. Қырғыз жеріндегі марафонға 4 мың адам қатысып, кіл мықтылар өнер көрсетті. Алдыңғы жарыстарда аяндап бірінші болып алға шығып кетіп жүрсем, бұл жолы қарсыластарымның әр қадамын аңдыдым. Жүгіру тәртібін білмегендіктен бұрын бірінші шықсам болды деп ойлайтынмын. Тәжірибе жинай келе бұл спорттың да өзіндік айла-әдістері барын түсіндім. Соның арқасында Қырғыз елінде топ жардым. Бұл спорттың жүлде қоры өте аз. Тіпті кейбір жарыстарда мақтау қағазымен шығарып салады. Соған қарамастан жүгіру спортын жаныма серік еттім. Қазір 4 немеремді де осы спортқа баулудамын. Мақсатым төрткүл әлемге Қазақстанның атын танытсам деймін, – дейді биыл 68 жасты алқымдап тұрған қария. Иә, Жақсылық Мамырбекұлы жұбайы Гүлбаршынмен бірге 2 ұл өсіріп, 4 немере сүйіп отырған жан. Немелерін қазірден жүгіруге машықтандыруда. Ал Қырғыз елінде өткен жарыста қария 42 шақырымды 4 сағатта жүгіріп өткен екен. Бұл, әринеғ егде жасқа келген азамат үшін ғана емес, аяқ-қолы балғадай жастардың өзіне оңай шаруа емес. Енді қария веломарафонға бет бұруда. Бұл бағытта оған Тараз қаласы әкімдігі велосипед алып беруге уәде етіпті. Және жергілікті билік веломарафонды елорда күніне орай «Жамбыл-Астана» бағытынан бастауды ұсынған. Ол үшін жерлесімізге 1300 шақырымды бағындыру керек. Жақсылықтың сөзіне сүйенсек, бұл қашықтықты өтіп, астана күніне дәл жету үшін марафонды 22 маусым күнінен бастау керек екен. Енді тек ол қала әкімдігі уәде еткен велосипед пен жолдағы шығындарға қолдауды күтіп отыр. Жақсылықтай марафоншыға қандай қолдау білдірсе де артықтық етпейді. Сондықтан жергілікті билік уәде еткен дүниелермен желаяқ қарияны жақын арада қамтамасыз етеді деп сенеміз.