Шымкент прокуроры жалған нөмірге қатысты жанжал үшін қарамағындағы қызметкерді жазалады

Шымкент қаласының прокуроры Ғабит Мұқанов соңғы үлгідегі Toyota Land Cruiser көлігінің жалған нөмірлеріне қатысты жанжал үшін қарамағындағы қызметкерді жазалады. Жол талғамайтын көлік аудандық прокуратураның маңынан байқалып, желідегілер ол қадағалау органының қызметкеріне тиесілі екенін жазған, - деп хабарлайды Tengrinews.kz тілшісі. Әңгіме Абай ауданы прокуратурасының бөлім бастығы Аман Қожабаев туралы болып отыр. Қазнет қолданушылары ол Toyota Land Cruiser көлігіне жалған нөмір таққанын жазған. Қалалық прокуратура бұл көлікте бөтен адамның нөмірлері ілінгенін растады. Алайда қадағалау органы жол талғамайтын көлік Қожабаевтікі екенін жоққа шығарды.

Жол талғамайтын көлікте 001 PR 17 мемлекеттік нөмірі тағылған. Прокуратура мәліметінше, олар жалған болып шықты және жүргізуші Toyota Land Cruiser көлігімен қалада заңсыз жүрген.

Қадағалау органы 001 РR ​​17 мемлекеттік нөмірі Aster Auto Shymkent жеке компаниясында тіркелгенін атап өтті. Алайда, былтыр қыркүйекте бұл нөмір тіркеуден алынып, оған жаңа көлік бекітілмеген. Бұған дейін әлеуметтік желілерде Аман Қожабаев Шымкенттің экс-прокуроры және Сыбайлас жемқорлыққа қарсы қызмет бастығының бұрынғы орынбасарының ұлы екені хабарланған болатын. Алайда прокуратура бұл мәлімдемені растаған да жоқ, жоққа да шығармады.

Еске салайық, наурыздың ортасында Шымкенттегі айып тұрағына Toyota Land Cruiser жол талғамайтын көлігі қойылған, оның иесі көлікті жалған нөмірмен жүргізген болып шықты. Желі қолданушылары оны Шымкенттегі Абай ауданы прокуратурасының көлік тұрағынан көрген. Олардың айтуынша, жол талғамайтын көлікке тағылған мемлекеттік нөмірлер басқа көлікке жазылып, қайта тіркелмеген. Сот жалған нөмірмен көлік жүргізген Toyota Land Cruiser жүргізушісін жазалаған. 4 сәуірде ер адам ӘҚБтК 590-бабының 4-бөлігі ("Көлiк құралдарын пайдалану қағидаларын бұзу") бойынша жауапқа тартылған.